قصة ولد العم .....تذكروا انها قصة لا أكثر

وانا كمان مليت ونسيتها

لي متى انتظر

الصراحه انا مليت ونسيت القصه وكل قصه بقراها ما بتتكمل لييييش نفسي اعرف ليش

افففففففففففففففففففففف
او بعدين

السلام عليكم و رحمة الله و بركاته

انا عضوة يديدة في هالمنتدى و ارجو من الاعضاء الترحيب واريد ان اكون

عضوة فعالة

مع تحياتي

بنوتة زايد

(((((الجزء الثالث والثلاثين)))))



دخل يعقوب ويا خليفة الكافيه وكان الجو محشور بنات وصبيان من كل جهة .. ومعظهم كانو عرب .. لذا حس شوي بالإنتماء بعد الـ 6 شهور من الغربة لولا خليفة ..

يعقوب شقته كانت فخمة ووايد أنيقة .. طبعا غالية وديكورها عربي .. حاول يخليها قدر الإمكان مشابه لبيتهم والبيوت العربية عشان مايحس بالغربة .. كان عنده كل البطاقات وباقات القنوات العربية والأجنبية .. بس هو كان يطالع العربية أكثر .. من بعد ماطلعو من الكافيه عن الشباب عزم يعقوب خليفة وواحد ثاني تعرفو عليه إسمه ماجد .. ووايد إندمجو وياه بالسوالف .. ماجد سعودي بس عايش طول عمره بأستراليا ولا يعرف شي عن ديرته غير إنها شيخة ديار الخليج وأكبر دولة عربية ..

أول مادخل يعقوب والشباب البيت خليفة قعد يصفر ..

خليفة : أوه أوه أوه .. لا يكون بس شليت اللي ببيتكم وحطيته هنا!!
مايد : إي ولله بيتك تصميمه حلو مرة .. إنت مسويه؟!
يعقوب : لا .. بس آنه طلبت من إختي إنها تدز لي بعض الديزاينات بالنت بحيث إنها تناسب الشقة ..
مايد وهو ينسدح على الصوف ا: عليك بالعافية يايعقوب ((تثاوب)) أقول قعدوني بعد ساعتين ..
خليفة يبي يمسك مايد من كلمته : شوو ياريال قعدوني!! إنت للحين تقول جيه؟! قول نششوني .. ياهل ياريال تقول قعدوني!!
مايد طبعا إستغرب من لهجة خليفة بس ماعلق : هذي هي نششوني!!
خليفة بإشمئزاز : خس الله إبليس .. والله اللهجة ماشي حلاتها إلا بلسان بويوسف ..
يعقوب وهو واقف على باب غرفته : فديتك يابوراشد .. شباب آنه بنام .. الأكل بالمطبخ زاهب .. ولين يه روس لا تحتشرون وياه أوكيه؟! تعبان حيل ..
خليفة من زمان إستقر بالبيت وحمل الريموت كونترول : هيه يابو يوسف .. أمرك ولا أمر الحكومة .. إنت سير نام ونحن نطالع لنا فلم عربي بعدين ننش من هنا ونرد بيوتنا .. هيه ((ويكلم مايد)) بكرة أي يوم؟!
مايد وهو مغمض عيونه : باكر السبت .. كيف تنسى الإجازة!!
يعقوب : حلو .. باتو عندي الليلة .. كاهي الصوفا تفتح كفراش .. بعد شتبون أكثر؟!
خليفة : آنه خليفه المزروعي ولد مبارك المزروعي الله يرحمه أرقد لك على صوفا!! تخسي .. إلا أرد بيتنا وآكل لي شوية بلاليط وأسير ليما يصير السبت ليلة الأحد .. والله حالة .. حد مايسهر بـ saturday night!! صج إنا عرب ..
مايد إستوى بقعدته بعد آخر جملة : وأحسن الناس وأفضلهم ..
خليفة : هييييييييه .. خوووووووووووش رمسة ياراعي الشهامة ..
مايد : إنت تتطنز؟!
خليفة : لا أبد!! شو أتطنز!! بالعكس .. كيف أتطنز عليك وإنت ربيعي!!
مايد ماعرف معناة ربيع .. وفكرها تعني شي هو فهمه : هييييييييييي إنت .. كيف كيف ربيعك!! لا يالطيب .. أنا كذا مايعجبني .. كيف ربيعك أنا!! رجال أكبر منك ومن يعقوب تقول لي ربيعي!! شوف ياخليفة ..

مايد فكر الكلمة إن لربيع الطفل الصغير اللي بربيع عمره ..

يعقوب تدخل لأن خليفة صار بويهه أكبر علامة إستفهام : لا ياماجد .. صل على النبي .. هو ماقصد شي .. نسيت إن خليفة إماراتي ولهجتهم تختلف عن لهجتكم ولهجتنا؟! بس لا تعصب .. مايقصد شي يوم قال ربيعي .. ربيع يعني رفيج أو صديق ..
مايد تغيرت ألوانه : مسامحة ياخليفة .. والله إني فشلان .. إنت بعد لا تسكت صحح لي!! تعرفني عمري ماتخالط ويا هل الخليج .. سامحني ياخوك ..
خليفه وهو يبتسم : بالحل ياخوك .. وبعدين مابينا فرق .. إنتو ترمسون شي ونحن نرمس شي .. ماشي فرق .. ولا شو يايعقوب؟!
يعقوب يضحك على مايد وخليفه اللي تعمد يتكلم بكلمات صعبة يديدة على مايد : هههههههههههههههههههههههههه هيه .. ماشي إختلاف ماشي ..
مايد وهو ينسدح مرة ثانية : إي والله .. ماهي حالة كذا!! محتاج مترجم ليما أجلس معاكم!!
خليفة وهو يغمز ليعقوب من ورا مايد : لا تزيغ يابوسهيل .. مالها داعي هالزيغة والحرج علينا .. آآآآآآآآآآآآآآنه أعلمك على الرمسة ..

يعقوب دخل الغرفة وتم يضحك على خليفة .. وكل ما يبي يرفع السماعة حق المكالمة الإسبوعية لأهله ينزلها وهو يضحك .. وبعد ماسكت شوي قعد على فراشه وسحب التلفون لعنده .. يتصل بالبيت .. ماكان واثق إنه يلقى أحد لأن اليوم اليمعة وكلهم يمكن متيمعين في بيت عمه بوحمد .. بس بالنهاية إتصل ولا عليه ..

سمر بالصدفة كانت في بيت عمها بويعقوب ويا دانة اللي بالغصب جرتها عشان تروح تعتذر لسارة ليش إنها ماحضرت خطوبتها .. سمر كانت يالسة بالصالة ودانة عند سارة اللي كانت زعلانة موت من سمر ومابغت تنزل لها ..

يرن التلفون .. ويرن التلفون .. وسمر ولا معبرته .. آخر شي سكت .. ورد يرن ويرن.. ليما سمر ملت منه ورفعته ..

بالطرف الثاني سمعت : إي مايد .. عندك كل شي بالثلاجة .. وي لقيت خط .. ألوووووووو .. ألووووووو ..

سمر تجمدت مكانها .. حست الدنيا تغيرت .. كل شي إنقلب فوق تحت .. بعد 6 شهور .. بعد 6 شهور ما تخيلت إنها تسمع هالصوت .. يعقوب ماغيره ..

يعقوب بالطرف الثاني مستغرب : ألوووووووو .. ألو يمه .. سارة .. باكي لايكون إنتي اللي شايلة السماعة!! ألوووووووووووووو ..

سمر بالطرف الثاني حست إنها تخدرت ودموعها بدت تنزل كأن أمس يعقوب مسافر مو من 6 شهور ..

كل اللي قدرت تقوله : آنه سمر ..
يعقوب ماسمع لأن سمر كانت تهمس : هاااااااااا!! باكي بذبحج تكلمي ..
سمر رفعت صوتها اللي كان كله بجي : قلت لك آنه سمر!!
يعقوب حس كأن أحد صاب عليه ماي بارد .. كل شي فيه إرتعش .. يده .. رموشه .. ريله .. قلبه .. روحه .. من سمع الرد .. آآآآآآآآآآآآه ياسمر .. سمر محد غيرج .. سمر ياروحي التايهة عني من 6 شهور ... ياعنفوان العمر كله .. يابعد هالدنيا ياسمر .. الموت والله الموت أشرف لي من هالعيشة بلياج .. يعقوب ماقدر يحبس دموعه أكثر .. ولأنه كان بروحه خذ راحته ..

يعقوب : هلا سمر .. شلونج؟! شخبارج؟!
سمر كأنها تعاتبه : بخير .. وإنت؟!
يعقوب : بخير دامج بخير ..
سمر : جذاب ..
يعقوب إستغرب : شنو؟!
سمر : إنت عمرك ماهتميت لي يعقوب .. سافرت ولا كان عليك مني .. تقرر أشياء بحياتك بدون ماتشملني ..

سكتت سمر وماحبت تزيد بالكلام عشان لا تنزل مستواها عنده .. ويعقوب من جهة ثانية يسمع كلام ثاني .. شقاعدة تقول سمر .. شقاعدة تخربط .. آنه أشملها .. بحياتي .. وليش هي تعاتبني ليش إني سافرت ..


سارة نزلت وشافت سماعة التلفون على الكراسي وسمر تطلع من البيت .. ركضت سارة لعند التلفون وسمعت يعقوب ينادي ..

سارة : يعقوب .. حبيبي يعقوب آنه سارة مو سمر ..
يعقوب بإحباط : سارة!! هاذي إنتي!! وين سمر؟!
سارة : مادري عنها .. توها كانت هني والحين طلعت .. شلونك شخبارك؟!
يعقوب بقهر وملل : بخير بخير .. شخبارج إنتي وشخبار أمي وأبوي وراشد وحمد؟!
سارة : أهل البيت بخير لكن أهل القلب عال العال هههههههههههههههههههههههههههههههههههه ..
يعقوب مو متفيج خير شر لسارة : إنزين سارة أمي بالبيت؟!
سارة : لا طلعت ويا خالتي أم نوال عزيمة حريم ..
يعقوب إستغرب : عزيمة بيوم اليمعة!! وقعدة الأهل؟!
سارة وهي تقعد بحسرة : أي قعدة أهل؟! من بعد ذاك اليوم يايعقوب محد يروح بيت أحد .. ماكو إلا آنه اللي أروح بيت عمي حمد وساعات أروح بيت عمي بوحمدان أشوفه .. حتى سمر وآنه ماعدنا مثل قبل ..
يعقوب إستغرب أكثر وأكثر بس حس إن الوقت يمشي من عنده : أوكي سارة .. البطاقة شكلها بتخلص .. أتصل فيج مرة ثانية .. إنزين يله مع السلامة ..
سارة : الله يسلمك حبيبي ..

بعد ماسد الخط قعد يفكر بللي صاير .. وهو يفكر نام شوي لأنه كان تعبان وقعد بعد ساعة وطلع بره .. الكل كان نايم عند التلفزيون حتى روس .. وراح عند خليفة يبي يوقظه بس خليفه كان مثل الطوفة مايتحرك .. ويوم لمسه يعقوب حصل له ذاك الطراق اللي شوي وأفقده الوعي .. سحب له كوشن من الصوفا وإنسدح عليها وهو يطالع السقف ورد حق أفكاره ..

علامهم الأهل إستخفو وقعدو .. شلون يتركون قعدة اليمعة ويروحون بيوت الناس .. متى صارت .. عمي بوحمدان موافق .. ولا ابوي ولا عمي بوحمد ... ولا سمر .. آه ياسمر .. بديت أخاف عليها .. لايكون أحد مضايقها .. أو حمد وسارة حارقين قلبها .. يابعد روحي ياسمر .. تركي التعب والسهر والعذاب لي وإنتي تهني .. خلي الدموع وكسر الخواطر والظليمة لي وإنتي رفرفي .. يابعد حياتي يابلسم جروح القلب الدامي .. آنه أستحمل الموت ولا أستحمل أشوف دمعة عيونج .. آخ ياسمر .. مرارة بقلبي أحسها ليما أردد إسمج .. كأن روحي بتطلع من جسدي .. ليش .. ليش كنتي بعيدة وصرتي بعيده وبتظلين بعيدة عني ليش .. آنه شرتكبت بهالدنيا عشان ألاقي كل هالآلآم .. عشت حياتي وآنه بين هاذي وذيج .. يالله ألفت إنتباهج وأحس إنج تغارين علي .. لكن لا .. إنتي ظليتي تحبين حمد .. حمد اللي غدر فيج وحب سارة بدون مايحس فيج .. آنه اللي كنت أنزف عنج كأني آنه المطعون .. وكأني آنه المغدور فيه .. سمر ماتقدرين تتصورين شكثر آنه محتاج لج .. محتاج لدفا إيدج .. ورقتج اللي تمنيتها دايم بأحلامي .. أحتاجج سمر .. أحتاجج ..

ظل يعقوب مكانه ليما نام من كثر الأفكار والدموع المترقرقة بعيونه .. حس إنه إرتاح شوي من بعد كبتة 6 شهور خلته مثل الصخر من ثقل الهموم اللي بقلبه ..

سمر من طرف ثاني راحت عند المسبح وقعدت .. كل شي تغير .. الخيول ماعادت بالبيت مثل قبل .. ريحة الجو غير .. يعقوب مو بالبيت .. خيال حبيبي مو عندي .. عندها هناك .. اللي مهما كانت أتمنى من ربي إنه يراويني إياها عشان أعرف شنو الفرق بيني وبينها .. وشنو اللي خلاها تفرقني عن حبيب عمري كله .. آه يايعقوب .. آه وآه وآه .. ولا يشبع قلبي على السنين اللي ضاعت وآنه أفكر بحمد .. أوقات وساعات وحزات لين تكون قاعد وياي ولا تحس فيني أو حسستني إنك تفكر فيني ..

إنسدحت سمر على كراسي المسبح المظللة مع إن الدنيا كانت غايمة .. قعدت تبجي وهي تنادي يعقوب من كل جوارحها .. تشهق بالبجي .. وتلم جسمها المتألم والمتعني وتحتسب لله .. كانت تبي تسكت عن البجي لكن أتفه الأشياء كانت تبجيها .. تذكر شكل يعقوب وتبجي .. تذكر كلامه الجارح وتبجي .. تذكر مشيته تبجي ... تذكر ضحكته تموت من الألم وهي ماتقدر ترفع عيونها عن الأرض .. العالم كان كله مشترك بحداد سمر على يعقوب .. الطيور تغرد وياها .. الأعشاب والشير يتمايل يمين يسار بكل هدوء .. نسمة الهوا الباردة تلفح ويهها وتطير دمعاتها الكبيرة .. وتظل مثل السيلان تجري في مسار واحد ..

بعد مرور الـ 6 شهور الثانية ..

اليوم كان حفل تخرج سمر ودانة .. الكل مرتبش بالبيت .. بوحمدان وأم حمدان .. ناصر اللي تخرج بنسبه 89.5 وفرح حيل على النتيجة .. دانة بعد نجحت بنسبة زينة 84% .. كان الوقت للحين ظهر والكل يستعد حق الحفل .. سمر كانت أهدأ طالبة متخرجة ممكن أحد يشوفها بحياته .. كان لين أحد يهنيها على النسبة المشرفة 97.9% تبتسم له بكل تواضع وتشكره .. هي راح تلقي خطبة الخريجات وهي مو خايفه أبد .. لأنها حاطة الكلمة مثل ماتبيها .. رسمية .. بسيطة .. مفهمومة .. سريعة .. مثل فرحتها ..


(((((الجزء الرابع والثلاثين)))))



في مطار الكويت وصل يعقوب ومعاه خليفة بعد رحلة طويلة .. خلصت السنة الدراسية على خير .. يعقوب نجح بكل إمتحاناته بإمتياز لأن تخصصه هو مجال خبرته .. الرياضيات .. أما خليفه فعليه إنه يرد أستراليا للمرة الأخيرة عشان المادة اللي رسب فيها .. وخلاص يرد الإمارات .. خليفة رافق يعقوب للكويت بالرحلة لأنه كان وده يشوف أهل يعقوب من كثر مايعقوب يسولف عنهم .. ولأن يعقوب بعدين بيسافر الإمارات بناء على دعوة من خليفة عشان يوريه أملاكه وحياته بالإمارات ..

خليفة : أقول لك ياريال سير وياي دار الخير والله راح تحس بالدنيا .. أقول لك الإمارات دار الحياة ..
يعقوب : مادري والله ياخليفة .. أخاف أكلف عليك ..
خليفة : خس الله حظك يالسبال!! شو تكلف عليه!! إنت ناسي البرادة اللي خلصتها بشقتك وأخليك لازم كل يوم تجرجها!!
يعقوب : هيه والله .. آنه شلون راح عن بالي ..
خليفة لوى على يعقوب : إي والله شلووووون راح عن بالك يامعود!!
يعقوب : هههههههههههههههههههههههههههههه تتطنز وياويهك!!
خليفة : لا والله!! ليش أتطنز!! بالعكس ماكو طنازة ..
يعقوب : إذلف يله لا بكس يطيرك أستراليا مرة ثانية ..

خليفة توه بيرد ويرن تلفونه .. يتنهد ليعقوب ويختفي ويخلي يعقوب ناقع من الضحك عليه ..وإلتفت يعقوب بالمطار ماشاف أحد .. أشوة محد يدري عن ردته من السفر .. هو يبي يخليها مفأجأة للكل .. يعقوب قرر هالسفرة بعد كلام طويل ويا خليفة ومايد اللي أقنعوه ووروه بصيص أمل بحبه ويا سمر ..

مايد : يايعقوب الدنيا دايما تمنحنا الفرص الثانية مع اللي قلبنا يبغاهم .. لأن الله سبحانه وتعالى مايضيع الإنسان ويعطيه على صبره وإنتظاره ..
خليفة : آنه ويا مايد يايعقوب .. إنت شعرفك؟! سمر كانت صغيرة والحين إستوت بنت كبيرة وتفهم للي تبيه .. ويمكن مشاعرها تغيرت تجاه حمد ولد عمك 180 درجة!!
مايد : إي صح بعد ..
يعقوب بعد سكون وهو يعظ على ظفر الإبهام : تهقون؟!
خليفة : إي يايعقوب نهقى ..
مايد : ماتيوز إنت عن سوالفك!!
خليفة : شوف يابوسهيل .. لاتخليني إرمس بالإماراتي وأخليك تشب ضو مثل كل مرة .. هاه شوفني زاهب ..
مايد : لا يابو تيلة إسكت أحسن لك .. والله إن لسانك هذا متبري منك ..
يعقوب : أووووووووش لا تتهاوشون .. حزتكم إنتو بعد!! أقول لكم تزهبو يله .. بنروح الكويت ..
خليفة : شووووووووو ياريال!! وين نسير الكويت!! خل السمستر يخلص قبل بعدين نروح .. ولا إنت هب ذاكر الأيام والغياب؟! أبوية خلني أخلص وأودر ديرة الميانيين أحسن لي ..
ماي د: محد جاب لروحه الشقا غيرك .. خلك عايش بديرتك أبرك لك ..
خليفة : آنه أبى أعرف .. إنت شو دخلك بقعدتيه ولا شقايه؟! خلني ياريال أتنعم بشبابي!!
يعقوب : ياااااااااااااااااااربي بس عاد!! والله كأنكم توم وجيري كله مناجر!! بس عيل .. بعد السمستر نسافر الكويت .. شرايكم؟!
خليفة : أوووووووووكي مان ..
مايد : آنه إعذرني لأني بروح السعودية لأول مرة .. وبصراحة أنا مشتاق مرة لهم كلهم .. ومرة ثانية يابويوسف بجيك الكويت .. بعرسك إن شاء الله ..
يعقوب بسخرية : إن شاء الله ..
خليفة : طبعا آنه بحضر وبكون أول المدعوين والمباركين .. لأن ربيعي هو المعرس .. وراح أيول وأرزف وأرقص لين ماطيح ويطيح مني اللي يطيح .. شرايك يعقوب؟!

يعقوب نقع من الضحك .. وقام خليفة اللي إنتقل للشقة ويا يعقوب من بعد ذيج الليلة .. وشغل المسجل على حده بأغنية ((يامرحبا)) لعيضة المنهالي .. وقام يرزف وييول ويعقوب إرتبش وياه .. وقعدو يرقصون إثنيناتهم مثل الميانين ومايد ناقع من الضحك عليهم ..

دخل روس وكل اللي قاله : stupid clowns ..

طلع يعقوب من المطار والساعة كانت 2.30 بتوقيت الكويت .. الجو بدى يحتر وحمد ربه إنه كان لابس كندورة والكل يطالعه هو وخليفة على بالهم إماراتيين .. يعقوب تنسم الهوا وكمل دربه لسيارته اللي وصى فيفيك ييبها عشان يروح البيت .. وأول ماشاف الكروزر تذكر يوم اللي ياب سمر من المدرسة وإبتسم ..

خليفة : بلاك تتبسم للينانوة؟!
يعقوب : ماشي ..

في بيت بوحمدان الساعة 3 ..

أم حمدان : ها يمة .. زهبتي أغراضج؟!
سمر بنفس تعبانة : إي يمة ..
أم حمدان : علامج سمر؟!يعورج شي ولا تعبانة؟!
سمر تطالع الساعة : قلبي يدق يمة مادري ليش ..
أم حمدان : لا تحاتين يمة .. بتكونين أحسن وحدة .. وقلبج هذا بسم الله عليه من العوار خايف شوي خانت حيلي ..
سمر إبتسمت لأمها : يمكن ..
ناصر دخل البيت وهو يركض : سمر .. يمة .. دانة وصلت .. حرمتي وصلت إستقبلوها .. بروح أغير هدومي ..
أم حمدان : إركد ياناصر!! علامك مستخف اليوم!! هاذي الدشداشة العاشرة اللي تبدلها اليوم!!
ناصر وهو يركب الدري : مو حزتج يمة مو حزتج ..
أم حمدان تطالع سمر : والله إستخف أخوج!!
سمر : هههههههههههههههههههه لا يمة .. ناصر يحب دانة ..
أم حمدان : إي والله حلاتها مرت ولدي .. وإنتي حبيبتي .. شخاطرج فيه؟!
سمر تنزل عيونها للأرض : سلامتج يمة ..
دانة بدخلتها وهي حاملة زي التخرج : السلام عليكم ..

أم حمدان وسمر قامو يسلمون عليها ..

أم حمدان : هلا دوينة .. شلونج شخبارج؟!
دانة بحيا جميل : بخير خالتي .. إنتي شخبارج؟!
أم حمدان : بخير ياويه الخير ..
سمر : هلا دندن ..
دانة : هاي سرسور .. أقول لج خيطي لي هالجاكيت .. والله ذابحني .. قايم كلره ولا يقعد ..
سمر : إن شاء الله .. تعالي فوق وياي ..

في بيت بو يعقوب الساعة 3.00 وصل يعقوب مع خليفة ..

خليفة : يايعقوب هب عدلة هاي .. أسكن وياك بالبيت!!
يعقوب : إنطم وسد بوزك .. أصلا إنت من قال لك إني بسكنك ببيتنا؟! شوف إسطبلاتي؟! هناك بتقعد ويا الحشرات ..
خليفة : خس الله ويهك يامسود الويه .. آنه أرقد ويا الحيوانات!! صج إنك تعبان ..
يعقوب : مادري عنك!! أصلا إحنه عندنا بيت ضيافة بالحديقة اللي ورا .. بتسكن هناك كأنك عايش ببيتك الخاص .. حتى الخدامة بنحط لك .. على بالك إحنه عيال فقر!!
خليفة : لا والله محشوم يابويوسف .. إلا قول لي .. الخدامة غرشوب؟!
يعقوب وهو يسكر عيونه : يله .. ولا ييوز!! شنو إنت!! خلاص مادلين وربيعاتها راحن كلهن خلاص .. إنت الحين بالكويت .. بالكويت ياريال ..
خليفة بحزن : هيه والله ..
يعقوب : قوم خلني أفرح أمي بويهي الصبوحي ..
خليفة : ويه خاق مب ويه صبوحي ..

سارة كانت لافة شعرها برولات وقاعدة بالصالة .. تتزهب حق حفل تخرج سمر .. سمر كانت الطالبة الوحيدة اللي عطوها 3 دعوات لأنها إمتياز مع مرتبة الشرف بالمدرسة .. لذا سارة وأم حمدان وحمدان راح يحضرون الحفل .. دخل يعقوب البيت من دون يضرب الجرس .. سارة وقفت مكانها وشافت الداخل .. أول شي تخرعت لكن بعدين ركضت صوبه وقعدت تحبب فيه وتحضنه ..

سارة : يابعد عمري بويوسف .. وحشتني ..
يعقوب : أوووووووووش سارو ويهد!!
سارة : ليش؟!
يعقوب : وياي ربيعي خليفة من الإمارات ..
سارة بصوت واطي : أووووووه سوري مادري ..
يعقوب : ماعليه شمسوية بروحج؟!
سارة : اليوم حفل تخرج سمر وبروح وياها ..
يعقوب وقف قلبه : اليوم حفل تخرجها!! ومن بيروح؟!
سارة : آنه وأمها وحمدان ..
يعقوب : بس؟!
سارة : بس ..
يعقوب بتفكير : زين .. الحين روحي دارج وخليني أدخل الريال ..
سارة بلعانتها على يعقوب : حلو ربيعك هذا؟!
يعقوب طول صوته : ساروووووووووو ويهد!!

سارة ركضت لدارها فوق وهي ناقعة من الضحك ويعقوب بالمثل ..

يعقوب : تفضل خليفة .. البيت بيتك ..
خليفة : شو ياريال!! هزبت إختي مب عيب عليك؟!
يعقوب : هااااااا!! أشوف صارت إختي إختك!!
خليفة بويه طفولي متفاجأ : آنه وإنت هب إخوان؟!
يعقوب يبتسم : ونعم الإخوان بعد .. تفضل ..
خليفه : زاد فضلك ..

الساعة 4 في بيت بو حمدان .. سمر ودانة يتعدلون بالغرفة .. الزي أزرق وفيه خطوط فضية .. سمر ودانة ينو وهم يحطون المكياج .. كل وحده تتفنن .. دانة بينت لون عيونها الرماديات باللون المناسب وطلعت فنانة وحلوة حيل .. سمر كانت معدلة حواجبها وطلعت مثل القمر .. بينت رسمة عينها اللي مثل الغزال وبين كبرها .. كل اللي سوته إنها حطت لمسة زرقة فيها لمعة فضية روعة وخلت شفايفها تلمع بغلوسر .. سشورت شعرها اللي خلال السنة طول زيادة على طوله ووصل لردفها .. إحتارت تخليه مفتوح ولا تسويه تسريحة ..

دانة : خليه مفتوح .. أحد عنده هالشعر ويربطه!!
سمر : بس أحس إني بحتر منه ..
دانة : خلي الخصل القصيرة جدامج وباجي الشعر ورا ..
سمر سوت اللي قالته دانة : جذي؟!
دانة تطالع سمر بإعجاب : الله يعين الحاضرين .. سمور عيونج ذباحة .. والله عذاب ..
سمر : ههههههههههههههههههههههههههه إنقلبتي لي نصور ..
دانة : إحم إحم نصور عندج .. عندي آنه ناصر قلبي .. وثانيا من عاشر قوما أربعين يوما صار منهم ..
سمر : بس بس .. كملي يله مابقى إلا نص ساعة ..
دانة : سمر تهقين بيوم عرسنا بنصير حلوين جذي؟!
سمر إنقبض قلبها على طاري العرس : مادري ..
دانة تعرف إن سمر تذكرت يعقوب : سمور .. مابي أعو ر قلبج .. بس اليوم آنه حاسة إن حظج وحظي راح يتغيرون ..
سمر بسخرية : لشنو بالله؟!
دانة : مادري .. إيماني بالله قوي وإحساسي مايخيب ..
سمر كأنها حست بحماس دانة : الله يسمع منج ..

الساعة 4.15 في بيت بويعقوب .. نزلت سارة وهي ولا تدري إن يعقوب ورفيجه يالسين بالصالة .. لأن عايلة يعقوب فري مو مثل عايلة خليفة .. سارة وقفت تسلم على الشباب قبل لاتطلع .. كانت لابسة فستان تافتاه مورد كم طويل يوصل للكف وكم ثاني للجتف .. وكان الفستان بقصة من تحت .. وكانت القطع تتطاير ليما تمشي سارة بشكل أثيري .. شعرها طول ووصل لنص ظهرها وكان مموج ولامع .. وخليفة يوم شاف سارة بلع ريجه .. حس إنه واقف جدام ملكة جمال .. وشوي بياكلها بعيونه .. بس مسرع ماتعلم عليها ..

سارة : شحالك خليفة؟! إن شاء الله بخير؟!
خليفة : بخير وسهالة .. يسرج الحال .. وإنتي شحالج؟!
سارة : الحمد لله بخير .. عايشين .. إلا أقول لك .. خطاك السو ..
خليفة ماعرف شيرد لكن قال لها : الشر بعيد عنج .. ليش؟!
سارة : عشت سنة كاملة ويا أخوي وطلعت سليم منها .. مبروك ..
خليفة : من قال!! أصلا مب كل الجروح باينة .. أخوج هاي طلع الشيب من راسي .. بس آنه ساكت عنه حاشمج ..
سارة : لا لا لا .. لا تسكت عنه ولا شي.. وره .. ههههههههههههههههههههههههههههههه ..
خليفة : ماعليج .. أبرد حرتج فيه ..

سارة نقعت من الضحك .. إسلوب خليفه كان فكاهي يشرح النفس والخاطر ..

سارة : هههههههههههههههههههههههههههههههه أخليكم الحين .. باي ..
خليفة : مع السلامة ..
يعقوب لحق سارة لبرع البيت : سارة .. سارو ..
سارة : لبيه ..
يعقوب : سارة لاتقولين لسمر إني وصلت من السفر ..
سارة بإبتسامة : إن شاء الله ((وتطلع شي من جنطتها)) هاك ..
يعقوب : شنو هذا؟!
سارة : بطاقة زوار للطوارئ .. عطوها سمر لأن عمي اليوم بيرد من السفر بأي لحظة .. بس هو إتصل وقال إنه مابيرد اليوم وخل حمدان يصور الحفل .. إذا حبيت تتيي تعال ..
يعقوب : أوكي ..
سارة حبت أخوها على خده : نورت الكويت والله .. مع السلامة ..
يعقوب : الله يسلمج ..
(((((الجزء الخامس والثلاثين)))))


محد كان يدري إن يعقوب رد من السفر إلا سارة .. أمه وأبوه طلعو مسافرين العمرة وبيردون يوم الخميس .. راشد كان بالدوام بيخلص بعد ساعة .. حفل تخرج سمر مابقى عليه إلا نص ساعة .. ودخل يعقوب البيت عند خليفة اللي كان قاعد داخل ..

يعقوب : خليفة .. سارة عطتني بطاقة لحفل تخرج سمر .. شرايك نروح؟!
خليفة : إنت تبا تسير سير .. آنه شدخلني!! ولا تباني أوقف عند الباب مثل الناطور أترياك؟!
يعقوب : تكفى خليفة .. متى طلبتك آنه؟!
خليفة : إنت كل رمسة والثانية قلت لي متى طلبتك!! وآنه شمييبني الكويت؟! يدتي؟!
يعقوب : عااااااااااااااااااد أرجووووووووووووك ..
خليفة : حب صبعي الصغير وعقب يصير خير ..
يعقوب : قوم زين لا بكس على ويهك ..
خليفة : هيه على بالي بعد .. آنه مادلع .. ماسير الا بالبوكسات .. فاهم؟!

يعقوب مات من الضحك وسحب خليفة لداره عشان يبدلون ويروحو ن مرة وحدة ..

الساعة 5 العصر في صالة فندق السفير كانت حفلة التخرج .. ودانة تتكلم بالتلفون ويا ناصر .. سمر واقفة مع الأبلة تتمرن جدامها على الكلمة .. الأبلة إستانست حيل لأن سمر كانت تلقي الكلمة بكل ثقة وشجاعة .. وقالت لها مافي شي بيخليها ترتجل ولا تغلط .. لكن المفاجأة كانت أكبر من التصور ..

سمر قلبها بدى يدق بقوة .. أقوى من الظهر .. تحس بروح يعقوب وياها .. تحسه بين الناس وعيونها ماتشوفه .. بس قلبها اللي يدري عنه ..

دانة سكرت التلفون وهي تطالعه : يابعد عمري .. هووووووووو سموووووور ..
سمر إرتبكت : هاااااااا .. خرعتيني!!
دانة : سلامتج .. علامج سرحانة؟!
سمر : دانة والله بموت .. قلبي يدق مثل القطار ..
دانة : ماعليه .. إنتي بس خايفة من الحضور .. لكنج قدها يابنت الذري ..
سمر : لا والله مو هذا اللى مخوفني .. دانة .. أحس بوجود يعقوب ..
دانة : حبيبتي هدي بالج .. يعقوب وين وإنتي وين!! هدي بالج ولا ترتبكين .. وراح تكونين آخر تمام .. يله عااااااااااد .. تكفين آنه أستمد شجاعتي منج ياسمر ..
سمر تحضن دانة : وينج عني كل هالسنين؟!
دانة: قاعدة بالكرسي الأخيري ..

سمر ضحكت على كلام دانة .. وقعدت تتذكر أيام المدرسة .. تحاول تشغل بالها بالذكريات .. لكن هيهات .. صورة يعقوب ماتروح عن بالها .. عزفت الفرقة الموسيقى المحددة لحفل التخرج وطلعت الخريجات بمشية متناسقة حلوة .. سمر كانت قبل دانة بثلاث بنات .. سمر كانت تمشي وعيونها على الأرض .. بذيج اللحظة دخل يعقوب وكان عنده واسطة ودخل خليفة وياه .. وقف يعقوب عند الباب ليما يخلص مرور الخريجات .. يدور عليها .. على ويه إنحفر في قلبه لكن مالقى .. رفع نظره للستيج وقعد يطالع .. سمر كانت ورى الستار مع الأبلات .. والبنات الباجيات ..

يعقوب راح ويا خليفة اللي الحضور من البنات تمو يطالعون هذول الشخصين الوسيمين .. يعقوب كان لابس قميص أسود بلمعة ماركة CK .. ولابس حزام ببكل فضية لامعة وكان شكله روعة باللحية الخفيفة .. خليفة كان لابس بنطلون بيجي وقميص هندي ((أقمصة أنريكيه)) بس تطريزه كان خفيف .. وكان شعره شوي طويل من ورى وناعم حيل .. خلا البنات يتخبلون على شكله .. سارة إلتفت لهم وطالعتهم .. بغت تأشر لكن ماحبت أحد يلاحظ ..

يعقوب وقف ورا بآخر الكراسي والحضور اللي كان بالخلفية .. بعاد عن الستيج لذا كانت هناك شاشة عرض لهم تبين الخريجات .. ألقت العريفة كلمة بمناسبة التخرج .. ومن بعدها طالبة ثانية قعدت تقرا بعض الآيات العطرة من القرآن الكريم .. وبعدها كلمة الخريجات باللغة الإنجليزية .. ويه دور سمر ..

العريفة : والآن .. كلمة الخريجات باللغة العربية .. تلقيها لكم ((سمر ضاري الذري)) ..

دوى المكان تصفيق من إسم سمر الهيبة .. واللي كل الحضور كان ماد رقبته يطالع هالحورية اللي نزلت من السما لحفل التخرج .. خليفة يود يعقوب اللي من شاف سمر وقف .. ماقدر يطالع شكلها بس لمعة عيونها عرفته عليها ..

خليفة يهمس ليعقوب : ياويل حالي منك يايعقوب .. أثاري البنت حورية نازلة على الأرض وتقول لي عادية عسب لا أنفتن فيها!! أوريك يالسبال ..

يعقوب ماكان يسمع شي .. كل شي كان ساكن بالنسبة له .. كل شي كان صامت .. يطالع سمر من شاشة العرض وهو واقف .. وكانت سمر بدت تلقي التحية على الوزير وبعدين الحضور .. وتمت تتكلم ليما وصلت لهالحد ومدت بصرها للي بالخلفية ..

((وإننا اليوم واقفات هنا ليس إلا نتيجة التعب .. والكد .. والمثابرة على مستجدات التعليم .. وكما أن سبب وقوفنا هنا ليس إلا بسبب)) وحل الصمت .. حل السكون عند سمر ... إلتفت عيونها بالواقف بعييييييييييد مثل الظلال .. عرفت ذاك الشخص .. عرفت ذاك الطول .. يعقوب ماغيره .. الوقت وقف .. والعمر وقف .. وعيون الكل على الحورية اللي إبتعدت عن الواقع وسرحت بالخيال .. حركة من الأبلة تأشر لها بالإستمرار ولا عليها .. سمر حست بالإرتباك .. شلون تكمل .. ضاع الكلام .. نست الكلمة .. تحسست بيدها على المنبر .. شافت هناك أوراق في حال إنها نست كلمة ولا جملة تلاقي غيها الكلمة .. قعدت سمر تقرأ من الأوراق لأنها ماتقدر ترفع عيونها وتنصدم بيعقوب .. هي ماتبي تفقد باجي شجاعتها .. ووصلت بالكلمة لآخر سطر ..ولكن حست إن الكلام للحين ظل بقلبها .. تبي تتكلم بس ماكو مجال .. رفعت عيونها أخيرا عن الأوراق وتكلمت من القلب .. وبدون توقف ..

((قد نقف اليوم بكامل شجاعتنا .. وبكامل قوتنا .. ونبدوا وكأننا نسوة لا يعلي عليهن .. لكن منا من يحترق حزنا على ذكريات مقعد الدراسة .. ومنا من يرتجف خوفا من المستقبل .. ومنا من .. يخشى أن ينزف ألما من ماجرى بالماضي .. ولكن تظل الذكرى خير دواء لكل عليل .. وكل صديق)) وبعض البنات مسحو دموعهم من كلمة سمر ..

((إلا أنا .. أقف اليوم هنا .. وعيناي تنظران لمستقبلي .. لمصيري .. هاهو مصيري إرتسم .. وهاهو حلمي الذهبي يتكون .. ولكن .. مازلت خائفة .. هل سيتحقق حلمي .. لا أكذب عندما أقول إني خائفة ((وعيونها بعيون يعقوب)) خائفة منك يا مستقبلي .. وشكرا)) ..

التصفيق دوى من كل صوب .. الكل صفق لسمر من قلبه .. حمدان رفع الكاميرا وصور سمر وهو يحاول يأشر لها لكن عيونها كانت على شي .. إلتفت قعد يدور على اللي سمر تطالعه .. وإنصدم .. يعقوب ماغيره .. واقف وعيونه بعيون سمر .. يتطالعون ثنيناهم كأنهم عايشين بعالم ثاني .. مسرع ماختفت سمر من على المسرح وراحت ورا الكواليس ..

الأبلة : الكل قال إن الكلمة إختربت لكن آخر السطور كانت جميلة ياسمر .. بارك الله فيج ..

سمر تبتسم للمدرسة بدون تعليق وعيونها مليانة دموع .. تحس كأنها محبوسة .. راحت قعدت عند كرسيها بالستيج .. تدور دانة اللي كانت تطالعها وهي تمسح دموعها .. سمر نزلت دموعها أخيرا .. وهي تضحك من خاطر ..

تم توزيع الشهادات والهدايا .. ووصلت الأسامي لعند ((سمر ضاري الذري)) والتصفيق والتصفير كان مدوي لأن قبل شوي سمر بجت الحاضرين بكلمتها الشفافة .. فعلى الرغم من غنها تجمدت بس كملتها ونست الكل الخطأ اللي صار .. نزلت سمر وهي تمشي لعند المدرج وعيونها ويا أمها وأخوها اللي كان يصورها .. بس مسرع ما إلتفتت ليعقوب اللي قعد مكانه .. تمت تطالعه وهو يطالعها وبعيونهم جرى أحلى الكلام بس محد سمعه .. ركبت سمر المدرج وهي شوي تزلق من على أحد العتبات .. يعقوب يود قلبه وسمى بالرحمن عليها .. هي تفاجأت من الموقف بس ضحكت وهي تخبي إبتسامتها .. يعقوب يضحك ويهز راسه على دعالة سمر اللي وين ماكانت لازم تطلعها ..

ختاما لحفل التخرج عزفت الفرقة العسكرية النشيد الوطني الكويتي .. سمر كانت تطالع يعقوب وهو يطلع من المكان بالنشيد الوطني ومعاه واحد ثاني .. وبس إختفى يعقوب من نظرها ينت .. وين بيروح .. نست كلمات النشيد ومخها فيه ألف فكرة وفكرة .. إنتبهت لرفيج يعقوب رد وقعد بالمكان اللي قام منه .. بس بروحه .. عيل وين يعقوب ..

إنتهى الحفل والموسيقى صادحة بأغنية فرقة ميامي ((نجحنا)) والكل يتصور ويهني الثاني .. سمر بس خلص كل شي نزلت من على الستيج تتسلم أكبر بوكيه ممكن ينهدى لأحد من بنت عمها سارة .. وحضنت أمها اللي كانت عيونها تلمع بالفخر .. وحضنها أخوها بعد وبارك لها .. سمر خذت سارة على جنب ..

سمر : سارة يعقوب رد من السفر مو؟!
سارة بإرتباك : شدراج؟!
سمر تبتسم من قلب : كان هني سارة .. كان واقف ورا بآخر الصفوف .. ماشفتيني يوم وقفت عن الكلمة ولادري شصار فيني!! إنصدمت يوم شفته .. بس الحين إختفى مادري وين راح!!
ويقترب منهم خليفة : السلام عليكم ..
سارة وسمر : وعليكم السلام والرحمة
سارة : هلا خليفة .. ها ييتو؟!
خليفة : هيه .. يعقوب مارام يصبر وقال لي نسير هنا ((يطالع سمر)) خطبة حلوة .. بالحيل مبروك ..
سمر بإستغراب من هالشخص اللى يتكلم بلهجة شوي غير مفهمومة : الله يبارك في حياتك ..
خليفة : سمر ممكن شوي من وقتج؟! عن إذنج طبعا سارة ..
سارة : أوكي مو مشكلة ..

سمر راحت عند خليفة اللي كان أطول منها بواااااااااااااااايد .. وكل البنات يطالعون الموقف بحقد وغيرة .. زينة طبعا كانت وحدة من البنات ..

زينة بقهر : مو كفاية يعقوب ولد عمها!! والحين هالرزة بعد!!
رنا : وإنتي شعليج!! خليها ويا اللي تبي!! هي كيفها ..
زينة : لا والله ..

رنا والبنت الثالثة راحو عن زينة ولحقتهم ..

خليفة : أندوج ((عطاها علبة مخملية ذهبية)) هاي من عند يعقوب ويقول لج بعد ماتخلصين سيري عنده .. هو واقف عند بوابة الحرس ((يبتسم خليفة لسمر اللي كان متخبل من جمالها وطفولتها)) ..

سمر إبتسمت له وراحت عند أمها تقول لها إنها بتطلع ويا البنات عزيمة مسوينها .. دانة بعد إختفت مرة وحدة .. وسمر حصلتها فرصة عشان تقول إنها ويا دانة ..

الناس وقفو سمر يوم كانت تبي تطلع من الصالة.. اللي يهنيها واللي يبارك لها .. والأبلات يبوسونها ويلوون عليها .. البنات يمدحون خطبتها .. بس كل شي ماهمها كثر ما إنها توصل لعند الحرس وتشوف يعقوب ..

طلعت من المكان وهي حامله بوكيه الورد .. كان في لمة شباب بس طلعت سمر تمو يصافرون بس هي ماعبرتهم كلش وراحت تدور سيارة يعقوب .. تركض بين السيارات وماهي ملاقيته .. وقفت وشعرها يطير من الهوا .. بمنظر أثيري قعدت تتلفت ونظرة العجز بعيونها .. رن تلفونها اللي كانت حاملته بمخباتها ورفعته .. شافت رقم غريب ..

سمر : ألو ..
الطرف الثاني : ألف ألف مبروك ..
سمر إرتجفت .. من يكون : الله يبارك فيك .. من معاي؟!
الطرف الثاني : آنه سعد ياسمر ..

سمر إنصدمت .. سعد .. آخر من توقعته سعد .. سعد الصديق الروحي اللي سمر عمرها مانسته .. بعد سنة من الفرقا يتصل فيها ..

سمر بفرحة كبيرة : سعد .. شدراك إني تخرجت؟!
سعد : سمر آنه كنت هناك .. وإنتي شفتيني ..
سمر بإستغراب : ماظن ((تدري إن عيونها مافارجت يعقوب)) آنه ماطالعت أحد اليوم ..
سعد : متأكدة ياسمر ..
سمر : إي متأكدة ..
سعد : إنزين طالعي جدامج .. سيارة بي إم دبليو عاجية ..

سمر تمت تطالع جدامها مثل ماوصف لها .. ووقفت لقت يعقوب اللي كان واقف يطالعها .. بس لحظة .. سيارة بي أم دبليو عاجية .. يعقوب واقف عندها .. ويعقوب يتكلم بالتلفون .. سمر ماقدرت تستوعب شصاير .. يعقوب هو مو سعد ..


(((((الجزء السادس والثلاثين)))))


بعد ماوقفت سمر مبهوتة من الموقف ومو قادرة تستوعبه قطع تفكيرها يعقوب ..

يعقوب : مفاجأة مو؟!

سمر حست إنها بتموت .. طول ذيج الفترة .. سعد كان يعقوب .. سعد هو يعقوب ويعقوب هو سعد .. ذاك الشخص اللى إحتارت بأمره وشغل أفكارها .. وسمع مشاكلها .. محد غير يعقوب .. ليش يعقوب يسوي جذي .. ليش شيستفيد من هالشي ..

سمر : يعقوب!! هذا إنت!! ليش؟! ليش يعقوب؟!
يعقوب : تعالي عندي .. وبتعرفين ..

وسد الخط .. سمر تمت واقفة مكانها والتلفون بإيدها .. نزلت إيدها .. ومشت لعند يعقوب بخطوات هادية وساكنة .. يعقوب تم يطالعها ويراقب ملامحها .. كانت مشرقة لكن مو مبتسمة .. الحيرة بعيونها لكن الراحة مبثوثة فيها .. حس إن روحه بتطلع ليما توصل سمر .. وتوصل سمر لعنده .. توقف مجابلته .. تطالعه وتطالع ملامحه .. كان أضعف من قبل .. ووجناته بارزة أكثر بس عيونه مثل ماهي .. رموشه الكثيفة .. وعيونه اللوزية .. ونظراته الناعسة ..

يعقوب : عطاج خليفة العلبة؟!

سمر تنتبه للعلبة اللي بيدها .. وتوها بتفتحها لكن يعقوب يود إيدها .. سمر إنتفضت من مسكة يعقوب لإيدها .. ويعقوب ظل ماسك يدها ..

يعقوب : سمر ممكن آخذج مكان نتكلم فيه قبل ما تفتحين هالعلبة؟! سمعي اللي أبي أقوله وبعدين فتحي العلبة .. موافقة؟!

سمر تحيرت .. وين تروح وياه .. شيبي يقول لها .. فكرت بالعلبة .. لايكون هدية حق حبيبته ويبي ياخذ رايها بها .. هالظنون كانت ببالها تلعب بس حستها تافهة شوي .. لأن اليوم عيون يعقوب فيها بريق ثاني .. نفس البريق اللي شافته يوم تناجره عند ممشى بيت بوحمد .. ونفس البريق يوم يلاقيها بالشارع بعد ماطلعت من بيت عمها .. ونفس النظرة يوم اللي أعلن فيه إنه بيسافر .. وهو يطالعها .. وبعد تردد وافقت .. وطلعت وياه السيارة ..


حمدان ونجاة وسارة كانو طالعين يوم شافو خليفة واقف يتكلم ويا مجموعة بنات كانو يطالعونه أثناء الحفلة .. وهو مستمتع حيييييييييييل بالجو .. ما وعى إلا على صوت سارة ..

سارة تبي تحرق قلب البنات بلعانتها : فديتك وينك أدورك من متى!!
خليفة مستعجب من سارة اللي يعرف إنها مخطوبة : هنى فديتج ..
سارة : يله حياتي نروح البيت .. قلبي ماكلني على حماني ..
خليفة وهو يفتح ويغمض عيونه : حماني!! منووووووووو؟!

سارة تمشي بعصبية يزعم زعلانة منه وهو يلحق وراها ويقول للبنات : آسف اليوم هب يومكم ..

البنات إنحبطو وراحو بعيد .. وخليفة لحق على سارة اللي كانت تضحك عليه ..

خليفة : أحيدج مخطوبة ولا آنه مغلط؟!
سارة : لا مو مغلط .. بس آنه متعودة على هالحركات واللعوزة .. إنت لو شفت البنات شلون ميتين عليك!! والله ماقدرت أيود روحي عن هالتمثيلية هههههههههههههههههههههههههههههههه ..
خليفة : ههههههههههههههههههههههههه أسميج شقايل ههههههههههههههههههههههههههه ..

سارة مافهمت شي بس شاركت خليفة بالضحك .. وعقب ثواني ..

سارة : صج وين يعقوب؟!
خليفة بجذب ماينكشف : مادري عنه وين .. بس آنه مستعيل وبروح البيت ..
حمدان : حياك نوصلك ..
خليفة : لا ماكلف عليكم ..
نجاة : أفا عليك ياولدي .. لا كلافة ولا شي .. إنت رفيج يعقوب ولدنا وبحسبة ولدنا ..
خليفة : الله يخليج أماية ..

ركب خليفة جدام ويا حمدان .. وسارة ونجاة قعدو ورا بالستيشن البيضا ..


بسيارة يعقوب الصمت كان مستحل المكان ... لا سمر تتكلم ولا يعقوب .. هو طلب منها ماتسأله ولا شي قبل مايوصلون للمكان اللي يبي يوصل له .. الدنيا غربت شوي .. والليل نزل ستاره على لناس .. وقف يعقوب السيارة عند البحر .. وين ماكان يقعد لين هو متضايق .. طلع من السيارة وسمر للحين داخل .. طاف على السيارة ووقف عند باب سمر .. فتح لها الباب وقال لها تطلع .. سمر طلعت عن يعقوب لأنها عصبت شوي من الصمت اللي يمكن ينفجر بويهها .. وهي ماتبي تتألم ..

يعقوب حس إنها متضايجة وبدا التردد يستحل فيه .. يله يايعقوب .. إنت دارس الشي ومخطط له .. سمر زعلانة ومتضايجة .. خلها .. بس لازم أقول لها اللي بقلبي ..

سمر : قول اللي تبي تقوله بسرعة .. ماعندي وقت ..
يعقوب : شفيج متضايجة؟!
سمر : مافيني شي .. قول بسرعة ..
يعقوب حس إنه يبي يلعوزها : إنزين تبين حلاو؟!
سمر تطالعه من غير تصديق : صج والله!!
يعقوب يطلع لها حلاو : ها شوفي ماتصدقيني!!

سمر قامت عنه ولكن يعقوب قعدها وهو يضحك عليها ..

سمر : تتمصخر!!
يعقوب : لا .. ألعوزج .. إنتي للحين فلفل؟!
سمر : لا نعناع ..
يعقوب : تخسين إنتي نعناع .. إنتي فلفل .. وأحمر بعد ..
سمر : يعقوب ..
يعقوب : سمر ..
سمر بغير تصديق : يعقوب!!
يعقوب وهو شوي ويموت من الضحك : سمر!!
سمر : أقوم عنك أحسن لي ..

وقفت سمر ووقف يعقوب وراها والدرب كان مليان حصى وشوي ظلام .. سمر تمشي بدون وعي وتعرقلت بالحصى وشوي وتنجب على ويهها بس يعقوب يودها .. بعد ماثبتت سمر بوقفتها قامت عن يعقوب وهي متصبغة حيل من الحرج ..

سمر : شكرا ..
يعقوب وهو يشوف شي غريب على ويه سمر لأول مرة .. الحيا والوناسة المخفية .. ولمع عنده أمل : لا عادي تعالي كل يوم ..
سمر : هاااااااااااه!! لاتصدق عمرك ..
يعقوب : وليش ماصدق عمري؟! شاذي ولا جرذي؟!
سمر : ممممممممممممم .. الأثنين ..

يعقوب إبتسم وسمر بعد .. وقعدت على الصخرة مرة ثانية .. ورد الصمت بيناتهم اللي كان أعمق من أي كلام .. يعقوب كان قاعد يفكر شلون يفتح الحوار ويا سمر .. وسمر كانت تبجي من خاطر ..

سمر : يعقوب ..
يعقوب إنتبه لصوتها الحزين : عيونه ..
سمر بدون ماتطالعه : يعقوب ليش سافرت؟! ليش رحت أستراليا؟! ليش خليت الكل وهديت كل شي ورحت عنا؟! ((كانت تبي تقول عني بس ماطلعت من لسانها)) كنا بالحاجة لك.. أبوك وأبوي .. الشركة توزعت .. حمدان ملج .. وسارة وحمد بعد .. كل هذا كان بلا طعم لنا من غيرك .. مافكرت فينا؟! مافكرت بشعورنا وإحنه بعاد عنك؟! ولا ما فكرت بروحك ياللي بتتغرب عن ديرتك وأهلك وناسك؟!

يعقوب كان يحس بالألم .. تخنقه العبرة والحزن .. وسمر كملت وهي تشهق بين الجملة والثانية ..

سمر : كنت تقدر تقول لأبوك عن اللي تحبها .. الإماراتية .. كان بيخطبها لك وبتقعد ويانه .. ولا إنك تفارجنا وتفارج الكل عشانها ((إلتفتت تطالعه وتطالع ملامحه المتعجبة من اللي تقوله كأن ولا شي من اللي تقوله الحين يعنيه))لهالدرجة تحبها؟! لهاالدرجة هي عايشة فيك ومخلتك بعيد عن الكل؟! حتى عن هلك وعن ناسك!!

يعقوب ماصدق روحه .. سمر تظن إني أحب أحد غيرها .. سمر تظن إني أحب الإماراتية الوهمية .. إنسانة إنذكرت كدعابة للحين تفتكرها إنسانة حقيقية .. آه منج ياسمر .. شربكتي كل شي .. وبنيتي لي حياة وهمية من فكرج.. شقول عنج .. البراءة ولا طيبة النية .. أحبج ياسمر أحبج .. لكن خليني أوريج الويل يالياهل ..

يعقوب : ماقدر أوصف لج ياسمر شكثر أحبها .. شفتي البحر اللي جدامج .. يطوفه ويطوف بحور العالم .. هي مثل ترياق المرض اللي يشفني .. مثل بسمة الصبح اللي تبري خاطري .. مثل الروح اللي أنحرم منها طول ماكون ويا الناس بدونها ..
سمر ماستحملت أكثر : عيل ليش كنت تتصل فيني على إنك سعد؟! خليتني أعيش حلم جذاب!! مو من حقك يايعقوب .. مو من حقك .. إنت لعبت بحياتي .. لعبت بمشاعري ... وخليتني آخر شي ((كملت كلامها وهي تغطي ويهها)) ..

يعقوب مافهم اللي قالته : شنو؟!
سمر ترفع يدها عن ويهها بدون ماتسمع سؤاله : مافكرت بأحد جان فكرت فيني!! آنه اللي عشت سنة كاملة بالعذاب والقهر والألم وآنه أنتظرك .. أنتظر منك كلمة .. لمحة .. شي يدل على إنك تحمل شي لي!! وقبل شوي إكتشفت إنك سعد!! فكرت إنك يوم بالأيام يمكن حملت شعور بقلبك تجاهي .. لكن لا((تهجد صوتها بالبجي)) تيي تسمني بكلامك عن اللي تحبها واللي قلبك مايقدر يعيش بدونها .. يايعقوب .. آنه إنسانة .. وإنسانة تنكسر بسهولة .. لا تظن إني قوية بلساني .. آنه قوتي كلها بلساني .. ولا قلبي .. مايقوى أمل وعذاب ..

وقعدت مكانها وهي شابكة ذراعينها على ركبتها وراسها منكس .. تبجي حرقة حبها الوليد اللي ينزف .. وقلبها اللي يعلن إحتضاره .. ولأول مرة يعقوب يحس بإنه مجرم تجاه سمر .. بسفرته .. بإبتعاده عنها .. لكن بغضون هالشي حس بالسعاده الكبيرة .. إكتشف إن سمر تحبه .. ولا هو فهم نفسه إنه يحبها .. يااااااااااااااااااربي .. الحين آنه فاضي أسألها عن شعورها تجاهي إن كانت تحبني ولا لا .. ياربي شهالمصيبة ..

رفعت سمر راسها ووقفت : ممكن توصلني البيت؟!
يعقوب : ياسمر آنه ماكلمت كلامي!!
سمر : مابي اسمع زين!! ودني البيت ..
يعقوب : سمر تكفين!!
سمر : ممكن توصلني الحين؟!

يعقوب سكت وتم يطالعها برجاء ..

سمر : بتوصلني ولا لا؟!
يعقوب نفذ صبره : لا لا لا .. إنزين شراح تسوين؟!
سمر ترفع جتوفها : بمشي ليما ألاقي سيارة توصلني ولا تكسي ..
يعقوب : لا والله .. حلفي ..

سمر تمشي عنه لكن يعقوب يسحبها ..

سمر متعجبة منه : مو من حقك .. إنت فاهم!!
يعقوب بقلة صبر : جب ولا كلمة .. وايد تتكلمين .. ماتيوزين عن طولة اللسان .. إنتي إنجبي لاحذفج الحين بالبحر .. إنتي فاهمة!!
سمر ردت تبجي لأنها حست بقلة الحيلة ومن لهجة يعقوب وياها : يعقوب ردني البيت .. تكفى ماقدر شتبي تقول لي أكثر؟!
يعقوب : مابردج كيفي .. بخليج هني الليلة .. زين؟!
سمر : لاو الله!! ليش عاد؟! ليش تعاقبني؟! إنت أصلا مالك سلطة علي ..
يعقوب : إلا لي سلطة عليج وعلى أبوج واللي ياب أبوج يابنت ضاري .. سمعي سمر .. آنه صبرت عليج وايد .. ومن صجي فكرت بالكلام اللي أبي أقوله لج .. أثاريج للحين خايسة ماتسمعين الكلام .. آنه ماحب إماراتية ولا شي .. آنه طول عمري أحبت بنت وحدة وحاولت كل جهدي إني أخليها تحس فيني .. ومبين إني نجحت .. ويوم نجحت طلعت البنت حمارة وماتبي تفهم ..
سمر حست بشعور غريب : من تقصد؟!
يعقوب هدت ملامحه وبصوت أهدى من موج البحر : إنتي يالغبية .. إنتي ..


(((((الجزء السابع والثلاثين)))))



يوم إعترف يعقوب لسمر إنها الوحيدة اللي حبها سمر ماصدقت عمرها .. كانت واقفة شوي ملاصقة يعقوب .. كانت تبان أقصر منه وتطالعه من فوق ..

بغير تصديق سمر تطالع يعقوب : آنه!!
يعقوب يمسك بيد سمر : إنتي كنتي دايما بقلبي .. من يوم ييتو الأردن عشان تكملون العدد .. قبلها كنتي بالنسبه لي بنت مثل كل البنات .. أول ماشفتج بالأردن وملامحج بدت تجمل وشكلج صار غير .. حسيت بنار تحرقني كل مرة أشوفج .. كنت أجذب على نفسي وآنه أعاديج وأقلب مشاعري للكره مع إنها كانت كلها حب .. بينما إنتي كنتي بقلبي وبعقلي ولا فارقتي أحلامي طول 4 سنين .. سكت بالأول لأني كل مرة أبي أكون وياج مثل الصديق أكسبج واكسب ودج .. وكنتي تناجريني وتدورين المشاكل بيناتنا .. كرهتيني بنفسي وبحياتي .. ومن بعد ماتغيرتي وصرتي بنت كل من يغرم فيها من أول نظرة تحولت مشاعري ناحية الكل للوحشية .. تصدقين إني غرت عليج حتى من سارة إختي!! عاديت سارة وعاديت الكل .. لكن بعدين رضخت وقلت ماردج يوم بالأيام بتتغيرين خارجيا لكن جوهرج مابتغير .. حسيت إني بموت إن ماتواصلت معاج بأي طريقة .. ومكالمة ذيج الليلة غيرت كل شي بحياتي .. خذت رقمج وبديت أكلمج على إني سعد .. أكسب ودج وأكسب محبتج ..لكن بعد ماحبيتني .. يمكن وديتني لكن ماحبيتي سعد .. آنه مت من القهر .. وحاولت أعرف ليش انتي للحين مانجذبني لشخصية سعد .. وبعدين يت سالفة حمد وردته من السفر .. بذيج الليلة يوم تزفيني كنت متضايج من كلام رغد قالته وحمد ضحك عليه .. وقال إنه بس لعب عيال .. آنه مانسيت ياسمر وظليت أكتم واكتم .. أبجي بحرقة قلب محد يدري عنها .. بعدين حاولت أتناسى أو أفكر باللي إنقال .. قلت يمكن كان بس نتيجة وجود شخص يديد بالعايلة .. وإنتي بنت مثل أي بنت .. إنعجبتي بشخص حمد وبس .. عقب حاولت أكسبج بكل الطرق .. حتى إني إخترعت بنت عشان أخليج تغيرين .. ومبين إن مخج هذا حبك القصة كلها وبنى لي حياة مادري عنها ويا إنسانة وهمية .. وصلت الأمور ليما عرفت عنج إنج تحبين حمد ((يعقوب ترك إيد سمر وراح وقف مجابل البحر)) آنه هني إنهدت كل أحلامي وخططي وقوتي .. حسيت إني خلاص .. فقدت الأمل في حبج وإن خلاص .. مستحيل آنه وإنتي تكون لنا حياة وأحلام مشتركة .. حاولت أنساج بوجودج .. ماقدرت .. كنتي جدامي وقربي لكن بعيدة عني .. حاولت أنتقم منج .. أكره قلبي فيج .. ماقدرت ((إلتفت لها)) كنتي أقوى من هالأشياء .. وحبي لج كان أقوى وأعظم من هالمشاعر .. من بعد ماتحدد كل شي لسارة وحمد كنت حاسب إنج مازلتي تحبينه وإنج وافقتي على الخطبة مثل ماوافق حمدان .. لأنكم ماحسيتو إن مالكم نصيب بالإثنين ..
سمر قاطعته : لكنك طلعت غلطان .. آنه ماوافقت إلا لأن سارة قالت لي شكثر تحب حمد .. ولأني بديت أحس إني ماكنت أحبه أصلا .. مثل ما كنت متصورة إني كنت أحبه إنما آنه كنت أحس فيك إنت .. بس وجهت هالأحاسيس لحمد .. إنت كنت دايما بقلبي يايعقوب .. بس كنت مخبية حبي لك بأمل إسمه حمد ..
يعقوب يتقرب منها : عيل ليش طلعتي بذاك اليوم؟!
سمر : مادري .. شفت شي غريب بين سارة وحمد .. قعدت أفكر إن اللي يصير خيانة .. كرهت إن حمد يكون نفسه اللي تحبه سارة .. وإنه آنه إكتشفت هذا ولا قالت لي .. طلعت من البيت بعد لأني ماقدرت أطالع ويهك .. كنت أعرف إني أحبك بس ماعترفت بهالشي لنفسي .. كان ويهك يجرحني .. وإبتساماتك لغيري تأجج الغيرة بقلبي ..
يعقوب : من جذي ناجرتيني يوم قلت إني بسافر؟!
سمر تبتسم : ذاك اليوم آنه كنت متعدلة على آخر كشخة .. أبي أغريك وأخليك تنسى الإماراتية ..
ليما قلت لي عن السفر حسيت إني بموت .. روحي طلعت .. ليش بتروح!! ليش بتسافر الحين!!شراح تسوي هناك!! ألف سؤال وألف ظن وألف طعنة طعنت روحي ذاك اليوم ..
يعقوب يبتسم : عسى مانزفتي وايد؟!
سمر : وايد نزفت .. بدال الدم الدموع .. مامر علي يوم إلا وبجيت عليك .. لين أمل بالمدرسة أذكر اليوم اللي خذيتني فيه .. أمر بدرب المدرسة كل يوم بالشارع وين مالقيتني وأوقف وأطالع .. كنت بكل مكان يا يعقوب .. كل مكان ..

يعقوب طالع سمر .. إقترب منها .. باسها على يبهتها .. وحضنها بقوة .. لمها بكل هدوء وحنية .. وسمر كان ودها ترتاح بس ظلت تبجي .. تبي تبجي لآخر مرة ويعقوب ماكان يبين عليه الإعتراض .. تمت تبجي .. لكن بعد فترة باعد يعقوب سمر ..

يعقوب : الحين فتحي العلبة ..

سمر فتحت العلبة وشافت الشي يلمع بعيونها .. كانت عباره عن خاتم ذهب أبيض مرصع بماسة متوسطة الحجم على شكل قلب .. سمر تمت تطالع الخاتم بإنبهار .. ورفعت عيونها ليعقوب ..
سمر : هههههههههههههههه خاتم ماس .. شقصدك؟!
يعقوب ياخذ الخاتم من العلبة ويلبسه سمر : سمر .. آنه ماتمنى بحياتي غيرج .. ولا بي أحد يدخل حياتي غيرج .. أبيج تكونين سمر حياتي .. وآنه أكون يعقوب حياتج .. شرايج؟! تتزوجيني؟!
سمر : مايصير جذي!! نسيت إن حنه عرب!! لازم تخطبني بشكل رسمي من أبوي .. آنه مو أمريكية تعطيني خاتم ماس وتقول لي تتزوجيني .. سامع؟!
يعقوب : آآآآآآآآآآآآآآآه يامادلين .. لو ماعطج خاتم ماو جان رقصتي من الفرحة ..
سمر طقت يعقوب : ماكو مدلين من يوم ورايح فاهم؟! سمر وبس ..
يعقوب : هي لاتطقين لا رفسج الحين ..
سمر : إنت بس جرب ..
يعقوب رفس سمر بخفة لكن سمر إنطوت ريلها بس يعقوب يودها قبل لا تطيح : يعقوب!!
يعقوب يقلد عليها : يعقوب!!
سمر : ودني البيت بسرعة ..
يعقوب : ودني البيت بسرعة .
سمر : أووووووووووهوووووووووو مصختها!!
يعقوب : أووووووووووهووووووووو مصختها!!
سمر : يعقووووووووووووووب ..
يعقوب : يعقوووووووووووووووب ..
سمر وهي تمشي عنه : لين خليت عنك اللعب كلمني ..
يعقوب مات من الضحك : وين رايحة؟!
سمر تركب السيارة : البيت بعد وين!! ولا يكون ببالك تييبني هالمكان مرة ثانية زين ..
يعقوب يركب السيارة : إنتي حمارة .. تدرين؟!
سمر : هااااااااااا .. آنه حمارة!! صج إنك سبال!!
يعقوب : ها ها ها تحدي هالشكل إذا فيج خير ..
سمر : والله إنك مغتر بروحك .. لا يسمعك أنريكيه بس ..
يعقوب : يخسي انريكيه واللي يابوه وطوايفه كلهم ييبون شكلي ..
سمر تبتسم : في هاذي صاج ..
يعقوب بزهو : عيل شلون عيل ..
سمر : تدري اليوم البنات يقولون لي إني صايرة مثل شاكيرا .. مو؟!
يعقوب : تخسي شاكيرا واللي يابتها تييب ظفر ولا ملمح من ملامحج .. ياحبيبي إنتي أحلى منهم كلهم يابعد قلب يعقوب التعبان ..
سمر : ههههههههههههههههههههههههههههه يع شهالكلام؟! صج ماتعرف تغازل ..
يعقوب بغرور : تتحديني؟! أوريج .. أحبج احبج ياسمر أحبج ..
سمر : ههههههههههههههههههههههههه بس عاد هههههههههههههههههههههههههههه ..
يعقوب : أحبج ياسمر .. وأحب خدودج .. وأحب الأرض اللي تمشين عليها ..
سمر : يع خياس تراب وغبار ..
يعقوب : ماعليه كله يهون لعيونج ..
سمر : بتقعد تعطس لي ..
يعقوب : كل عطسة تشهد بحبي لج ياروحي .. أحبج أحبج أحبـــــــــــــــــــــــــــــــــــــــــــــج ..

سمر تمت ناقعة من الضحك على يعقوب وهو يتغزل فيها بالدرب .. السيارة كانت تمشي بسرعة 60ويعقوب ولا سكت وسمر تضحك عليه .. ويوم وصلو عند بيت سمر ..

يعقوب : لازم تروحين يعني؟!
سمر وهي مسندة راسها على الكرسي ومجابلة يعقوب : لمتى بقعد وياك يعني؟! لازم أروح!!
يعقوب : إنزين ((يلعب بأعصابها)) باتي في بيتنا اليوم ..
سمر : شنوووووووووووووووووووووووو!! أثاري أستراليا خربت مخك!
يعقوب : لا سمر .. بس .. أبي أحس بوجودج معاي على طول ..
سمر : حط صورتي عندك ..
يعقوب بحيا : ماعندي صورتج ..
سمر تبتسم : تبي صورتي؟!
يعقوب : لا .. مابي .. أبيج إنتي .. خلينا نروح نتزوج سمر ..
سمر : هههههههههههههههههههههههههه والله إنك أمريكي ..
يعقوب : من الزين بعد ..
سمر : هههههههههههههههههههههههههه لا حبيبي .. إنتظر يومين .. وتعال إخطبني من أبوي .. وشوف اللي يردك ..
يعقوب : يومين!! لا لا وايد يومين .. باجر بيي ويا أبوي نخطبج .. تعااااااااااااالي أبوي مسافر!! هئ هئ هئ .. سمر وافقي يله .. الحين أدق على حمدان وخليفة رفيجي ويصيرون شهودنا ..
سمر : حبيبي بس عاد لا تحن وايد!! إنتظرت أربع سنين ماتنتظر يومين!! ولا أقول لك .. يومين شوية .. خلهم إسبوعين ولا شهرين ..
يعقوب بوسع عيونه : طااااااااااع هاذي .. مادري أهفج بكف الحين!! أقولج يومين وايد تقولين لي شهرين!! صج تقهرين ..
سمر : ههههههههههههههههههههههههههههههه ..
يعقوب : يا ويل حالك يايعقوب .. سمر كفخيني خليني أتأكد آنه نايم ولا صاحي!!
سمر : بكل سرور ..

وبالفعل عطته كف ولكن خفيف .. يعقوب حس به فجأة ..
يعقوب : الحين دورج يله ..
سمر : ههههههههههههههههههههههههههه لا يوبا آنه متأكدة إني صاحية .. بس اللي قاعد يصير جزء من أحلامي .. أحبك يعقوب .. والله أحبك


(((((الجزء الأخير)))))




يعقوب ماصدق عمره وحبيبة عمره تقول له الكلمة اللي إنتظرها أربع سنوات من عمره في عذاب وآهات .. تم يطالع سمر بنظرة كلها حب وماقدر يتكلم .. رن التلفون وإنتبه له يعقوب .. كان رفيجه خليفة ..

يعقوب : هلا خليفة ..
خليفة : سود الله ويهك يالسبال .. مخلني هني بالبيت بروحي وسايح ويا حبيبة القلب!! ولا خبرتني على الأقل شصار بينكم وآنه أترياك!! صج إنك ماتستحي ولا تعرف الحيا ولا ميادينه .. وسارة بعد يننتني .. خلاص ماستحمل آنه .. مارووووووووووووووم ..
يعقوب : هههههههههههههههههههههههههههههه آنه وين ياخليفة وإنت وين ..آنه عايش بالجنة ياخليفة ..
خليفة : شو شو شو!! ها سيحتها؟!
يعقوب بزهو : كلها ..
خليفة : وااااااااااااابويه عليك .. ثراك هب هين ياولد شاهين .. أحيدك حمامة شاللي سواك صقر؟!
يعقوب يطالع سمر ويبتسم : يكفي إنها تحبني .. هذا يخليني أقوى من الدنيا كلها ..

سمر إبتسمت ونزلت راسها من الحيا ..

خليفة : وابويه ماروم آنه ماروووووووووووووووووم .. إلا اقول لك .. إتصلت فيني أماية اليوم وقالت لي عن بنت عمي .. يبوني أرد دار بوخليفة يعلني أفداه .. بسرعة عسب تتم الخطبة ..
يعقوب حس برفيجه وحزنه : شحالك إنت الحينه؟!
خليفه يتنهد : الموت حق يايعقوب .. حق ..
يعقوب : خل عنك هالرمسة وقول لي .. شرايك نتزوج بنفس الليلة؟!
خليفة : وابويه .. لا حبيبي .. أبى أتهنى بليلتي ويا حرمتي .. مابي أشارك أحد .. وبعدين منو اللي بييول ويرزف بعرسي هاااااااااااااه؟! إرمس ..
يعقوب : إي والله .. بس عيل .. آنه قبلك وإنت وراي ..
خليفة : على رمسة أمايا آنه معرس قبل لا أرد استراليا .. ماعلينا .. يله رد البيت خلنا نمر على السنتر قبل لا يسكرونه لا أرد الليلة بوظبي .. ها شو رايك؟!
يعقوب : إن شاء الله مسافة الدرب وياينك .. في وداعة الله ..
خليفة : في حفظ الرحمن ..

سكر الخط وقعد يطالع سمر ..

سمر : ههههههههههههههههههههههههههه حمد لله والشكر .. ماشبعت!!
يعقوب : لا ..
سمر : يله حبيبي .. آنه بروح الحين .. أوكي؟!
يعقوب : يله روحي ..
سمر منصدمة : إنزين مابتودعني؟!
يعقوب للحين يطالعها : لا ..
سمر : هو!! ليش؟!
يعقوب : كيفي ..
سمر : هههههههههههههههههههههههههههه إنزين إقلب ويهك لا تطالعني جذي .. والله يضحك شكلك ..
يعقوب : عاد آنه كيفي ..
سمر : باجر الخميس ..
يعقوب : ويعني؟!
سمر : باجر تعال إخطبني من أبوي ..
يعقوب : ماني .. هاااااااااااااه؟! شنو؟! أكيد؟! أعتمد سمور؟! أعتمد حياتي؟!
سمر : ههههههههههههههههههههههههههههههههه ماصدقت!! ياعمري عليك .. أحبك ..
يعقوب : تلعبين بأعصابي؟! فارجي يله ..
سمر : ههههههههههههههههههههههههههه إنزين ..
قبل لا تطلع سمر يود يعقوب قلبه : تعالي وين رايحة؟!
سمر : توك طاردني!!
يعقوب : إنتي تبينها من الله يعني؟!
سمر : هههههههههههههههههههههههههه ماقلت لي فارجي؟!
يعقوب : فارجي .. مو تطلعين!!
سمر : والله؟!
يعقوب : إي والله ..
سمر : لا صج؟!
يعقوب : لا صج؟!
سمر : أووووووووووف ردينا؟!
يعقوب : أووووووووووف ردينا؟!

سمر طلعت من السيارة ولحقها يعقوب .. وصلت عند نص الممشى ويعقوب يناديها ..

سمر : أووووووووووووووص لا أحد يسمعك!!
يعقوب بهمس : سمر .. نطريني سمر ..
سمر : ههههههههههههههههههههههههههههههههههه ..
يعقوب وقف مجابلها : ياعيني .. تدرين أموت على ضحكتج .. بس أموت على أسنانج أكثر ..
سمر : والله؟! الله يخلي الدكتورة ماجدة ههههههههههههههههههههههههههههههههههه ..
يعقوب : يعلني أفدا راس أمج ياماجدة على ضروس حبيبتي ..
سمر : يله حبيبي .. باجر إجازة وتعال بيتنا .. الحين الناس ليل شفيك!!
يعقوب : حبيبتي والله ماشبعت منج .. والله ماشبعت ..
سمر : بتيي الأيام وبتشبع مني ..

يعقوب تأفأف مثل اليهال وقعد يطالع الزراعة اللي عند الباب .. شاف جوري مزروع راح عنده وقلع وحدة .. عطاها سمر ..

يعقوب : لا تنسيني .. حلمي فيني الليلة ..
سمر : ماعندي وقت ..
يعقوب : بتصل فيج ..
سمر تمشي للباب : راح أسكر تلفوني ..
يعقوب : بتصل فيج على تلفون البيت ..
سمر : بنزع الفيشة ..
يعقوب : بركب لج البلكون ..
سمر وصلت عند الباب : بقفلها ..
يعقوب : تتحديني؟!
سمر : إي أتحداك ((متسببة البنت)) ..
يعقوب : إن طحت وتعورت وتكسر راسي إنتي المسؤولة ..
سمر : إن طحت بيودك .. وإن طحنا مع بعض بنتكسر مع بعض ..
يعقوب : أحبج سمر ..
سمر : وآنه بعد .. أحبك يعقوب ..
يعقوب بهمس : طولي على صوتج ماسمع ..
سمر : تعال عند البلكون ..

دخلت سمر البيت ويعقوب ركض لعند السياج فتح الباب ووقف عند البلكون .. طلعت له سمر ..

سمر تصرخ بأعلى صوتها : أحبك يايعقوووووووووووووووووووووووووووب المينون ..

يعقوب مات من الضحك عليها .. دخلت سمر عنه .. وتم ينتظرها .. طلعت له بعدين ..

يعقوب : وين رحتي؟! ولهت عليج ..
سمر : هاك إلقف ..

رمت سمر دفتر .. لقفه يعقوب .. شاف مكتوب عليه ((إلى حبيب حياتي)) ..

يعقوب : شنو هذا؟!
سمر : طول ماكنت مسافر كنت أكتب الكلام اللي أبي أقوله لك لو كنت معاي .. أبيك تقراه كامل .. وداخل بعد في صورتي .. إذا تبيها يعني ..
يعقوب : ألا أبيها ونص .. بسوي عليها كوبي وبعلقها بغرفتي ..
سمر : يله حبيبي روح الحين قبل لا أحد ييك ..
يعقوب : إنزين ماقلتي لي ..
سمر : شنو؟!
يعقوب : أحبك يايعقوب!!
سمر : واللي قلته الحين بالصراخ شنو هذا!!
يعقوب : هذا صوتج؟! صج حرمة .. سمعي هاذي عيل .. أحبج ياسمووووووووووووووووووووووووووور ..

هز يعقوب المكان بصوته وسمر يودت قلبها وماتت عليه من الضحك .. يعقوب مشى عنها لسيارته .. وقبل لا يروح طلع من الدريشة الللي بسقف السيارة ..

يعقوب : أحبج سمووووووووووووووووووووووووور ..

سمر تمت واقفة مكانها ليما إختفى يعقوب .. وهي تطالع السما .. الحمد لله رب العالمين .. ودخلت دارها ..

يعقوب بالسيارة قاعد يطالع صورة سمر .. حطها عند صدره وكمل دربه .. وعند أحد الإشارات وقف وإلتفت للدفتر .. أول صفحه كان مكتوب فيها ((رثاء عاشقة لقلبها)) ..

حبيبي .. أحبك كحب الشمس للقمر .. وأعشقك كعشق السماء للأرض .. لم أعرف متى أحببتك .. لكن أعرف إلى متى سأظل أحبك .. إلى الابد .. ياولد العم ..

سكر يعقوب الدفتر وكمل الدرب .. درب حياته اللي عاش سنين من عمره وهو يرسمه بروحه .. لكن من يوم ورايح .. ماراح يكون بروحه .. راح تكون سمر معاه .. ترسم الحلم وياه .. إلى الأبد ..

وسلامتكم ..




وسااااامحونـــــــــــــــــــــــــــــي على التأخير الي صار وبعدين خلاص نهاية القصة السعيدة

أشكركم على صبركم و أرجوووووووو المسامحة وان شاء الله أبداً ما بتنعاد في أي مشاركة لي
يلاااااااا لقاء قريب ان شاء الله في مادري وين ههههههه