مكياج للبناني

هالموضوع لعيونكون ياصبايا وخصوصا ريومة لأنها قبل قرن من الزمان طلبت مني أعلمها أصول المكياج وتوني أفضى لها

<<<<<<<<< خبيرة تجميل على غفلة

المهم رحت أدوج في مواقع الستات ولقيت طريقة المكياج اللبناني قلت أنسخها لكم هنا أصرف لي (( لدواعي الزوالة مثل ماتعرفون ))

وراح انسخ لكم المقطع الأول من هالمكياج وهو الأدوات اللي تحتاجينها عشان تضبطين المكياج اللبناني صح

ادوات المكياج :

1/ فراشي الوجه والعيون .
2/ عاقصة الرموش ( تفضل تكون بلاستك لانها لاتضر الرموش اما المعدن يضر الرموش ) .
3/ فرشاة الحواجب والرموش .
4/ اسفنجة لكريم الاساس ...
5/ مرطب قبل المكياج .
6/ كريم اساس يناسب لون بشرتك او افتح منها بدرجة .
7/ بودرة مضغوطة .
8/ كونسيلر يكون افتح من كريم الاساس بدرجة .. الكونسيلر الوان يوجد خافي للحبوب ولسواد وغيره ..
9/ لون اي شادو بني غامق للحاجبين ويكون افتح للشقراء .
10/ اي شادو ابيض بانعكاس زهري ليكون تحت الحاجب مباشرة .
11/ لون زهري فاتح .
12/ لون زهري اغمق قليلا
13/ لون بنفسجي فاتح
14/ بنفسجي زهري
15/ لون كحلي
16/ لون اسود
17/ قلم كحل ابيض واسود
18/ مسكارا سوداء
19/ آي لاينر اسود
20/ قلم شفاه بلون يبيج فاتح .
21/ قلم شفاه بلون زهري .
22/ احمر شفاه زهري فاتح.
23/ مثبت للمكياج ....

وبس

ثلاثة وعشرين أداة عشان في النهاية تسوين مكياج لبناني لسهرة وحدة بس

أنا من رأيي ,, إنتس تفتحين مشغل نسائي أصرف حسافة والله كل هالمكياجات عندتس ولا تستعملينها إلا اذا انعزمتي

عاد بما إن هذا هو أول المكياج اللبناني بصراحة ينعاف تاليه

قلت حرام أكتب موضوع مستعصي على البنات

وبما إني واعدة ريومة بطريقة مكياج سهلة فما لي الا اني أستقطع من وقتي نص ساعة وأبدأ أتفلسف عليكم وعليها

طبعا أدواتي ياحبيلي موجودة على تسريحة كل وحدة منكم مايحتاج تدخلون السوق عشان توفرونها

كل المطلوب ,,

كحل قلم ,, وكحل سايل ,, كريم أساس ,, شدو (( اللون اللي يعجبك )) ,, أحمر خدود (( برضو اللون اللي يعجبك )) ,, روج (( هالمرة اللون اللي يعجبني )) ,, محدد (( اللون اللي يعجب الروج )) ,, (( فاونديشن سايل بلمعة )) عشان تستغنين عن نثر اللماع الغبي بعد المكياج

هذي المقادير نجي الحين للطريقة :

أول شيء يفضل انك تستخدمين كريم مرطب اذا كانت بشرتك جافة شوي ,, واذا ماودك عادي يمشي الحال بدون هالكريم (( شعارنا الزبون دائما على حق ))

بعدين تحطين الكريم اللماع وفوقه كريم الأساس بتلاحظين ان وجهك فيه لمعة ونور (( النور احتمال يطلع نور الايمان ))

المهم أحسن شيء تبدين به المكياج بعد الكريمات هذي هو انك تبدين من فوق يعني من الحواجب ونازل

اذا حواجبك خفيفة ثقليها بالكحل الله يخليه لنا واذا كنتي مشقرتها ارسميها من جديد بس لازم تصيرين فنانة في الرسم عشان ماتصير حواجبك لوحة تجريدية

خلصنا من الحواجب نبدأ في اللي قتلت جرير وربعه

العين :

طبعا لازم يكون واصلها نصيبها من كريم الأساس ,, وتبدين في الشدو أو الظل ,, نبدأ نحط الإضاءة في الجفن الثابت اللي هو تحت الحاجب مباشرة ,, والإضاءة ممكن تكون لون ذهبي أو بيج أو حتى فضي

بعدين تنزلين على الجفن المتحرك اللي يغطي العين هنا عاد تبدا الفلسفة اللي لها أول مالها آخر

اخبصي الألوان على بعض وشوفي اللوحة الفنية وش تطلع لك

اذا كنتي ناوية تستخدمين لون واحد للشدو ,, تقدرين تسوينه بشكل متدرج ,, يعني درجة فاتحة للون من بداية العين (( الجهة الداخلية )) بعدين درجة أغمق شوي في الوسط ,, وفي نهاية العين حطي الدرجة الغامقة ,,

واذا بتستخدمين كم لون ,, فالأحسن انك تحطين اللون الفاتح من الجهة الداخلية للعين بحيث يكون في نفس الوقت هي طبقة تحتية للجفن وفوقها من الوسط اللون الثاني ويستحسن لو تختمينها بشدو أسود في نهاية العين >>> وصف يخلي الحليم حيران

بعدين نجي للكحل :

لازم تكحلين عينك من جوا بكحل قلم وتكثرين الكحل يعني تروحين وتجين بالقلم عشرطعش مرة لما تطلع العين سوداء بقوة

بعدين بالكحل السايل ترسمين على العين من برا إما رسمة كاملة أو ثلاثة أرباع رسمة يعني ترسمين حول العين وتتركين الجهة اللي تحت العين من جهة الأنف ويستحسن بعد إنك ماتسكرين رسمة نهاية العين (( من الجهة الخارجية )) عشان تبين رسمة عينك الحقيقية ,,

نجي للشفايف :

ارسمي بالمحدد على حدود شفايفك بس لاتكملين الرسم كأنه دائرة يعني ارسمي فوق وارسمي تحت والجوانب خليها بدون رسم إلا إذا ودك تحضرين حفلة تنكرية فما فيه مانع انك تشبكين التحديد

بعدين حطي الروج (( يفضل انك تحطين على شفايفك قبل الروج كريم أساس عشان يثبت عليه الروج ))

في الختام حطي أحمر الخدود فوق الوجنات باتجاه خارجي وحطي منه في الجبهة وعلى الأنف وباقي الوجه على خفيف عشان يصير فيه تناسق

وبس بالهناء والشفاء <<<<<<<< غلطانة في العنوان

جربوه اذا مشى الحال فبها ونعمت واذا مامشى روحي لأقرب مغسلة وافركي وجهتس فيها ويادار مادخلك شر

ودمتم سالمين

 

 

اتضر الرد

 

 

ان اول مره اشارك بس احب اقولك خفة دم ومعلومات جدا مفيده الله يجزاك الجنه والله يبسطك زي مابسطتيني عاهالصباح

 

 

شكرا على الموضوع اختي

 

 

مشكووووووووووووووووووووووره

 

 

شكرا لك