انتي اجمل من صباح السالفه وارض الكلام

انتي اجمل من صباح السالفه وارض الكلام
انتي اغلى من بياض القلب وانتي بسمته
ياهلا بك من هنا لين اولك لين الختام
ياورود ٍ علمت قلبي يضج بهمسته
ان نثرتك في يدين الحلم .. ناداني المنام
وان زهمتك ينتثر قلبي على اول غلطته
يامشاعر غيرت تاريخ عشقي والغرام
يارياح ٍ تشرح لدربي معاني عثرته
لا النظر كان العيون ولا الزعل وجه الخصام
ولا الحكي دفتر سنين ٍ مات داخل كلمته
لا اظطراباتي حقيقه ..لا ارتعاشاتي وسام
كانه اخفق هالخفوق ولا ارتقت لك نبضته
لا بداياتي قصيد .. ولا النهايات انهزام
ولا الحكي ورد ٍ تلعثم في شفاتك رقته
انتبهاتي لطرفك .. وانفعالاتي سلام
وارتياحي في وجودك .. طفل حقق رغبته
كل ما اجلس بين سمعك والنظر .. طار الحمام
يرسم اللي حس فيني .. ليتك اللي حسته
الله اعلم كيف اسوي كان رتبتي الوئام ؟؟
وانتهى من العمر عمر ٍ متعبتني قصته
كيف ابوصف لك هواك ؟؟ وكيف اغرد بانسجام ؟؟
وكيف اقول اني جعلت الليل يرثي ظلمته ؟؟!
كيف امازح هالطريق اللي عطا قدري .. خطام ؟؟!
وكيف اقول لبعد بكره : ليلة البارح جته ؟؟!
والله انه لو صفا وجه الزمن والحظ قام
لاترك المجنون يعبث لين تعقل دنيته
فهميني ياوهج صدري .. ترى الغيت النظام
من حياتي ياحياتي .. وانتي اللي هزته
كبـّلي طول المسافه واكسري خشم الحرام
واقهري ليل الثلوج اللي صفت لي وحدته
لك حروفي .. لك ذنوبي .. لك غرور الانتقام
لك بداياتي وجهلي .. لك نهاية خطوته
لو تلوّن واقعي بالحلم وانكف الصدام
لوّحي باصدق حلوفي .. واحلف انك سبـّته !!
ماعلى ادراج الرياح ان لمـّت احزاني ملام
ولا على حزني ملام ان كان ماتت ثورته
اقتحمت الشعر لجلك واكبر الظلم اقتحام
لكن الله راد حرفي يعجبك في رعشته
لو تواريخي سوالف كان اسولف للأنام
عن زهرعشق ٍ لمستي قبل مده شوكته !!
كنت احارب قلبي اللي حب وافرط فـ الهيام
كنت مابي تعرفين اني وقعت بلعنته
كنت اغالط .. كنت اكابر .. كنت اقول اني تمام !!
وان احاسيسي مجرد قلب مارس نزوته
وامتلا صدري بشوق ٍ مل من كثر الزحام
ماحصل قد جبت له طاري !! وطالت مدته
ويوم شفت ان المطر يزداد لا زاد الغمام
قلت اصرّح .. وابتدا الرسام يرسم لوحته
ان تخالط نبضنا صارت لك عيوني مقام
لين تاقف نبضة العاشق وينهي رحلته
وان تغليتي علي ّ ولا اعجبتك ارض الكلام
ويش عذرك من بياض القلب وانتي بسمته ؟؟‍
....
الباريسي

 

 

كلمات في غاية الروعة والجمال
تسلم ايدك
عسى ماننحرم منك
تقبلي مروري

 

 

وانتي أجمل همسه مرت علي

واانتي اعذب من جمال الرد وانتي اجمله

وكيف برسم لك سطور الهمس والورد قال

انك أنعم من زهور العشق وانتي اعذبه


شكرا لمرورك وردك الراقي ياااميره الموقع وعذرا لما رصته احرف الكيبورد تعبيرا لحضورك الكريم